Jokeren: Eg eri vaksin upp við skerpikjøti

Í kvøld byrjar sjónvarpskappingin Vild med dans, sum í kringvarpsskránni hevur heitið Dansifrøi.

Í fjør vann Sarah Mahfoud, sum hevur føroyska mammu.

Aftur í ár er ein luttakari, ið hevur føroysk ættarbond.

Jesper Dahl, í tónleikinum kendur sum Jokeren, er við í kappingini hesa ferð.

Hann var limur í Den Gale Pose, hann hevur havt fleiri hitt á egnum beinum og hevur eisini verið í sendingini Toppen af poppen og dómari í Talent.

Jesper Dahl hevði føroyskan abba.

- Eg eri vaksin upp við skerpikjøti, grind og spik og grindaknívi á vegginum, sigur Jesper Dahl, sum vónar, at føroyingar fara at stuðla sær, nú hann skal dansa saman við Mie Moltke.

Veddingarfyritøkurnar geva teimum ikki góðar vónir, men sjálvur heldur hann, at tey ikki standa aftanfyri hini pørini.