Sjóvinnustýrið fær nýtt hús í Vágum um tvey ár

Sjóvinnustýrið verður verandi í Vágum.

Men kanska flytur tað tó haðani fyribils.

Poul Michelsen, landsstýrismaður, ætlar at byggja Sjóvinnustýrinum nýggjan bygning fyri 13,7 mió. kr. í Vágum, tí hóskandi høli fáast ikki at leiga har. 

Verklagslógin um byggingina kemur skjótt í løgtingið.

Í fjør noyddist Sjóvinnustýrið at flyta úr Miðvági, tí bygningurin, stýrið var í, ikki leyk neyðug myndugleikakrøv. 

Síðani hevur Sjóvinnustýrið húsast í einum fyribilshøli við flogvøllin í Sørvági. 

Eisini óhóskandi

Fyribilshølið var upprunaliga ikki ætlað til skrivstovur. Tað rúmar harafturat ikki nóg væl virkseminum hjá Sjóvinnustýrinum, sigur Vinnumálaráðið.

Poul Michlelsen sigur, at fæst ikki høli til Sjóvinnustýrið í Vágum, er hann sinnaður at flyta tað úr Vágum til nýggi bygningurin er liðugur um tvey ár. 

Flutti í 2002

Sjóvinnustýrið flutti í Vágar í 2002.

Arbeiðseftirlitið hóttir annars við at melda Sjóvinnustýrið til fútan fyri brot á arbeiðsumhvørvislógina, tí arbeiðsumstøðurnar hjá starvsfólkunum eru so vánaligar.

Sjóvinnustýrið hevur nú slakar tvær vikur at fáa viðurskiftini í rætt lag. 

Annars fer Arbeiðseftirlitið til fútan við málinum.