- Tíðindi, mentan og ítróttur
Abe sleppur eftir øllum at døma at halda fram
![](https://kvf.fo/sites/default/files/styles/grein-ovasta-mynd/public/abe.jpg?itok=KzcX4TlU)
Sum forsætisráðharri skrivaði hann út val eitt ár fyri, at valskeiðið var úti.
Orsøkin var helst, at hann fekk størri undirtøku í landinum, ikki minst í kjalarvørrinum av kreppuni við Norðurkorea.
Sjálvt um hansara politisku mótstøðufólk hava ákært Abe fyri óreiðiligan vina- og kenningapolitikk, so stendur hann seg væl í veljarakanningunum.
Samstarvar við Trump
Tað hevur eisini vakt ans, at Abe og amerikanski forsetin Donald Trump er farnir at samstarva.
Abe var tann fyrsti forsætisráðharrin, sum var á vitjan hjá Donald Trump eftir forsetavalið í USA í fjør.
Japan og USA hava samstarvað síðan annan heimsbardaga, men undir valstríðnum segði Trump, at Japan skuldi rinda meira fyri teir 45 túsund amerikansku hermenninar, sum eru í Japan.
Sjálvt um veljarakanningarnar vísa, at Abe sleppur at halda fram sum forsætisráðharri, so er ivasamt, um flokkurin hjá honum, Liberal-demokratarnir, megnar at varðveita sín trivaliga meiriluta í undirhúsinum.
Um ikki, so verður roknað við, at tað verður truplari hjá Abe at broyta grundlógina í Japan.
Forsætisráðharrin vil, at Japan fær eitt hernaðarvald, sum kann vera við í altjóða álopum, og ikki bara sum nú, at hernaðarvaldið skal verja Japan ímóti ágangi frá útheiminum.