Sjúkrarøktafrøðingarnir farnir í verkfall

Semingsroyndin millum Sjúkrarøktarfrøðingarnar og Fíggjarmálaráðið um nýggjan sáttmála ístaðin fyri sáttmálan sum fór úr gildi 1. oktober, er endað, uttan at partarnar náddi eini semju. 

Tað hendi í gjárkvøldið, tá Terje Sigurðsson, semingsmaður, gavst við royndini at finna semju millum Felagið Føroyskir Sjúkrarøktarfrøðingar og Fíggjarmálaráðið. 

Tað vil siga, at arbeiðssteðgurin, sum varð fráboðaður í síðstu viku, nú verður settur í gildi. Tað eru allir narkosusjúkrarøktarfrøðingarnar á Landssjúkrahúsinum, Klaksvíkar sjúkrahúsi og Suðuroyar Sjúkrahúsi, sum fara í verkfall beinanvegin. 

Eingin ynskir arbeiðssteðg, og als ikki vit, skrivar Felagið Føroyskir Sjúkrarøktarfrøðingar. 

- Vit hava enn einaferð roynt at fingið ordiligar samráðingar við Fíggjarmálaráðið, men tíverri vísa tey ongan veruligan áhuga í at viðgera tey krøv, sum hava týdning fyri okkum. Hetta kunnu vit ikki góðtaka, og hava tí einki annað val enn at fara í arbeiðssteðg.

Okkara limir fáa munandi minni í løn enn aðrir starvsbólkar við somu útbúgvingarlongd og ábyrgd. Tað er eingin grundgeving fyri, hví hetta er so, annað enn at hetta er ein søguligur skeivleiki. Vit hava sum felag roynt at rættað skeivleikan í nógv ár, men svarið er altíð, at peningurin ikki er til tað. skrivar Felagið Føroyskir Sjúkrarøktarfrøðingar.