Landsstýrið fegið um uppskot úr andstøðuni

Landsstýriskvinnan í heilsumálum vónar, at eitt uppskot til samtyktar úr andstøðuni kann hjálpa sjúkrahúsverkinum til at stytta bíðitíðirnar.  

Uppskotið hjá Sambandsflokkinum um viðgerðartrygd er í Trivnaðarnevndini, har tað hevur verið síðani fyrsta viðgerð var 14.november.

Málið er aftur á skránni hjá nevndini týsdagin. 

Sambandsflokkurin heitir á landsstýrið um at seta eina skipan í verk um viðgerðartrygd til allar føroyingar og leggja fram neyðug lógaruppskot í hesum sambandi.

Eingin skal bíða longur enn ein mánað frá tí, at illgruni er staðfestur, til viðgerðin verður sett í verk. 

Ítøkilig loysn

Sirið Stenberg sigur seg vóna, at politikarar og serfrøðingar, sum Trivnaðarnevndin vónandi kallar inn, fáa lýst spurningin um bíðitíðir í sjúkrahúsverkinum.

Landsstýriskvinnan vónar, at vit koma nærri einari ítøkiliga loysn.

Sirið Stenberg segði við Útvarpið hálvan november í fjør, at uppskotið hjá Sambandsflokkinum er vælkomið.

Trivnaðarnevndin hevur higartil bara tosað um uppskotið hjá Sambandsflokkinum á einum fundi.