Sjúkrahúsini: Meira enn 170 uppskot komin

Á middegi var evstamark fyri at lata inn uppskot um, hvussu sjúkrahúsini skulu eita.

Aleksandra á Dul, stjóri á Klaksvíkar Sjúkrahúsi, sigur,  at umleið 170 uppskot eru komin inn við telduposti. Harumframt eru uppskot komin við vanligum posti, og har fólk sjálv hava borið teimum trimum sjúkrahúsunum skrivlig boð.

Samlaða talið av uppskotum er tí enn ógreitt.

Men aftrat navnauppskotunum eru eisini komin mótmæli, sigur Aleksandra á Dul.

Kappingin hevur elvt til nakað av mótstøðu, serliga í Klaksvík og í Suðuroynni, har fólk vilja varðveita verandi nøvn.

Navnanevnd viðgera uppskotini

Aleksandra á Dul sigur, at nú fer ein navnanevnd at viðgera innkomnu uppskotini. Síðani ger navnanevndin eitt tilmæli til landstýrismannin í heilsumálum sum tekur avgerðina.

Aleksandra á Dul væntar, hetta verður gjørt í endanum av juli mánaði.

Virðislønin fyri bestu nøvnini til sjúkrahúsini er 10.000 krónur. 

Í treytunum fyri kappingini stóð, at tað kann annaðhvørt vera sama navn til øll trý sjúkrahúsini við undirheitum, sum vísa til økini Klaksvík, Tórshavn og Tvøroyri, ella trý ymisk nøvn, sum hóska saman.