Við kavaplógv frá Kollafirði til Vestmanna

Tað hevur kavað nógv í nátt og í morgun, og Landsverk hevur stongt nógvar vegir, meðan teir hava grivið. Eitt nú hevur Oyggjarvegurin, Gjáarvegurin og vegurin um Velbastaðháls verið stongdur. 

Kavaplógvin, ið koyrir millum Kollafjarð og Vestmanna, hevur verið úti síðani klokkan 5 í morgun, og vit fóru ein túr við fyrrapartin í dag. Tá var framvegis nógv jarðrok. Landsverk heitir á bilførarar um at koyra varliga.

Tað var Óluva Zachariasen, sum var og gróv kava saman við Sonnhard Dalfoss frá Landsverki.

Enn hált um alt landið

Landsverk sigur um koyrilíkindini nú, at tað enn er hált um alt landið.

Tað er ikki koyrandi til Gjáar og Syðradals, men nú er koyrandi úr Havn til Kirkjubøar og Gomlurætt.

Eisini er koyrandi til Velbastaðar eftir gamla vegnum. Tað fýkur illa um Velbastaðháls.

Á Oyggjarvegnum er koyrandi til Norðadals úr Kollafirði.

Tað er nógv jarðrok í ælunum. Annars verður heitt á bilførarar um at koyra varliga.