Viðgera uppskot um fótbóltshallir

Løgtingið fer í dag at viðgera eitt uppskot frá Bill Justinussen í Miðflokkinum og Jákupi Mikkelsen í Fólkaflokkinum, um at landsstýrið skal fáa heimild at lata helvtina av kostnaðinum í stuðli at bygga fótbóltshøll.

Treytin fyri stuðlinum skal verða, at byggiharrin einsamallur ella saman við øðrum rindar hina helvtina av kostnaðinum.

Byggiharrar kunnu til dømis vera einstaklingar, felagsskapir og samtøk.

Løgtingið viðgjørdi eitt líknandi uppskot í 2014, og tá varð mett, at kostnaðurin fyri eina fótbóltshøll var millum 60 og 100 milliónir krónur.

Nú metir Fótbóltssambandið, at íløgukostnaðurin er umleið 40 milliónir krónur.

Hjá landinum verður kostnaðurin sostatt 20 milliónir krónur, sum kann verða goldin út eftir tveimum ella trimum árum alt eftir, hvørja stuðulsskipan landsstýrisfólkið kunnger, siga Bill Justinussen og Jákup Mikkelsen í viðmerkingunum til uppskotið.