Ternan longri á beding

Strandfaraskipið Ternan verður eitt sindur longri á beding enn ætlað.

Ternan er framvegis á beding. Ætlanin var, at Ternan skuldi fara í sigling aftur 21. apríl, tað er leygardagin.

Men síðani Ternan fór á beding, eru sýnsmenn, sum hava kannað ein av tangunum, komnir til ta niðurstøðu, at neyðugt er at skifta nakað av stáli aftarlaga í skipinum, sæst á heimasíðuni hjá Strandferðsluni.

Av tí at arbeiðið, sum nú skal gerast afturat, er tíðarkrevjandi, verður Ternan ikki liðug á beding til tíðina.

Sostatt fer Ternan væntandi ikki aftur í sigling á Nólsoyarleiðini fyri enn 3. mai, sæst á heimasíðuni hjá Strandferðsluni.

Í tíðarskeiðinum 1. til 3. mai fer Sildberin at røkja Nólsoyarleiðina, og Sam fer at sigla farmatúrar týsdag og hósdag.

Ternan fór á beding 3. apríl, og síðani hevur Jósup røkt Nólsoyarleiðina.