Pensjónsnýskipanin samtykt við aðru viðgerð

Løgtingið samtykti við aðru viðgerð í gjárkvøldið pensjónsnýskipanina.

Meirlutin í Trivnaðarnevndini hevði gjørt broytingaruppskot, og eftir drúgt orðaskifti í tinginum í gjár, varð pensjónsnýskipanini samtykt við 19 atkvøðum fyri og 12 ímóti. Magni Laksáfoss atkvøddi saman við samgonguni.

Páll á Reynatúgvu legði í gjár broytingarupsskot fram, tí hann tók ikki undir við, at pensjónsaldurin hækkar. Men tað uppskotið tók hann aftur. Eftir hann hevði tikið uppskot sítt aftur, legði Jørgen Niclasen, formaður Fólkafloksins, tað framaftur. Men tá atkvøtt var um tað uppskotið, fall tað. 12 atkvøður vóru fyri og 19 ímóti.

Pensjónsnýskipanin skal nú til triðu viðgerð í tinginum, áðrenn hon er endaliga samtykt. Enn er málið ikki sett á skrá, men tað verður væntandi í næstu viku, tí ætlanin hjá tingformanninum er, at tingið skal heim í summarfrí flaggdagin, sum er mikudagin.