7,2 milliónir til granskingarætlanir

Stuðul er latin fýra ph.d.-verkætlanum og sels øðrum verkætlanum. 

Seks kvinnur og fýra menn eru verkætlanarleiðarar. Hesi arbeiða á stovnum og feløgum í Føroyum og í Danmark.

Størsta granskingarstuðulin fær David Turesson til verkætlanina: Íverksetanarumhvørvið í minni oyggjasamfeløgum - ein komparativ granskingarverkæltan av íverksetan í fíggjarligum framkomnum samfeløgum. Hann fær góða 1,1 millión krónur til hesa gransking.

Eisini hevur Rannvá Dahl fingið góða 1,1 millión krónur. Tað er til at granska í nýtsluni av fitisýrum og umsetninginum av karnitini í vøddakyknum hjá sjúklingum við CTD.

Og Sigri Gaini hevur fingið 1,1 millión krónur til verkætlanina Framsøgufrælsi og haturstala. 

33 umsóknir vóru um stuðul, og søkt varð um í tilsamans 24 milliónir krónur.

Við játtanunum í hesum umfarinum eru á leið 230 verkætlanir stuðlaðar, síðani skipanin við granskingarstuðli varð sett á stovn fyri góðum 20 árum síðani.

Tú kanst lesa meira um, hvør hevur fingið stuðul í ár til gransking á heimasíðuni hjá Granskingarráðnum.