Tollur á stál- og aluminiuminnflutningi úr Evropa

Tað skrivar Wall Street Journal.

USA hevur sett 1. juni sum mark fyri, at viðurskiftini í samhandlinum ímillum USA og Evropa verða broytt.

Seinast í mars boðaði Trump frá, at tollur uppá 25 % á stál og 10 % á aluminioum verður settur í verk, um viðurskftini í samhandlinum ikki verða broytt.

Stutt eftir boðaði hann frá, at Evropa, Kanada og Mexico og nøkur onnur lond í fyrstu syftu sluppu undan tollinum. Tað komst av, at tollurin serliga skuldi raka kinesiska útflutningin til USA.

Síðani hevur USA nýtt hóttandi tollin til at fáa handilsviðurskiftini við Evropa broytt.

Polittikarar og fyritøkur í Evropa hava sagt, at støðan kann føra til veruligt handilskríggj ímillum  Evropa og USA.

Á toppfundi í Bulgaria samdust ES londini um at bjóða USA til samráðingar um broytingar í handilsviðurskiftunum. Tilboðið er bert galdandi, um USA sleppur ætlanini um at leggja toll á evropeiskar vørur.

Um dagarnar ávarar franski forsetin ímóti einum møguligum handilskríggi, tí tað loysir ongar trupulleikar, segði Macron.