Heilsuhjálparar samráðast enn

Talan er um 650 limir, fyri tað mesta kvinnur, sum arbeiða á eldraøkinum, og Mary Antonsdóttir, forkvinna í Heilsuhjálparafelagnum, hevur áður lagt dent á, at talan er um láglønt kvinnustørv, sum skulu hava lønarlyft.

Mánaðarlønin hjá einum útbúnum heilsuhjálpara er góðar 23.000 krónur um mánaðin á hægsta stigi umframt viðbøtur, og tað er ikki nóg mikið, hevur forkvinnan sagt.

Hinumegin samráðingarborðið situr Kommunala Arbeiðsgevarafelagið, sum eisini skal taka atlit at, at tørvurin á eldraøkinum veksur støðugt, sohvørt sum miðalaldurin í Føroyum økist. 

Tað merkir, at kostnaðurin fyri eldraøkið veksur alsamt, og tað sama ger tørvurin á hjálpar- og røktarfólki á eldraøkinum.

Er lønin ov lág, er ilt at fáa mongu størvini sett, men er lønin hinvegin ikki lág, ja, so vaksa útreiðslurnar nógv.

Samráðingar um nýggjan sáttmála millum Heilsuhjálparafelag Føroya og Kommunala Arbeiðsgevarafelagið hava vart í nógvar mánaðir. Í verandi sáttmála stendur, at boðast skal frá verkfalli 48 tímar frammanundan, og annars stendur einki um undantøk, um talan verður um verkfall. 

Heilsuhjálparafelagið hevur í seinastuni skrásett lønarupplýsingar hjá limunum, sum skulu brúkast, um so er, at verkfall verður, og limirnir skulu hava útgjald úr verkfallskassanum.

Tá hesar samráðingarnar eru av, stendur Heilsurøktarafelag Føroya fyri tørni. Her er eisini talan í nógv størsta mun um kvinnustørv, eini 350 í tali.