Løgmansrøðan: Familjan er kjarnin

Fyri løtu síðani helt løgmaður sína ólavsøkurøðu.

Her kom hann millum annað inn á, at vit í dag yvirtaka familjurættin og legði dent á, at samgongan við sínum politikki vil spenna eitt trygdarnet undir borgaran.

Øll vinna tá familjurnar hava tað gott. Var boðskapurin hjá løgmanni, sum fleiri ferðir nevndi, hvussu familjan er kjarnin í samfelagnum. 

Løgmaður kom eisini inn á glóðheita búskapin, og hann segði, at ansast skal eftir almennu íløgunum. 

Harafturat segði løgmaður, at veiðigjaldið skal setast í verk, og tað var veiðigjaldið, sum man annars ikki fekk semju um í samgonguni.  

Løgmaður nerti eisini við raðfestingina av tunlum. Løgmaður segði, at Hvalbiartunnilin skal gerast fyrst, og síðani skulu tunlarnir norður um Fjall gerast. Løgmaður segði:

- Men samferðslukervið er slitið. Tørvur er á nógvum nýggjum tunlum. Tað má tó ikki vera soleiðis, at um vit ikki fáa fyrst, so skal eingin hava. Allir skulu gerast. Fyrst Hvalbiartunnilin, síðani tunlarnir norður um Fjall og síðani hinir. Hetta skal tó gerast við skili, og vit kunnu ikki gera allar í senn. Eysturoyartunnilin og Sandoyartunnilin fara at skapa møguleikar og styrkja bondini millum oyggjarnar og ymsu økini. 

Hoyr samrøðu við Árni Gregersen, politiskur viðmerkjari, omanfyri, har tikið verður samanum ólavsøkurøðuna. 

Ólavsøkurøðan kann lesast her.