Ókeypis verður ikki at koyra undir sjónum

Gjaldið fyri at koyra í teimum báðum undirsjóvartunlum, sum longu eru, verður ikki strikað, ikki so leingi, hendan samgongan er, varð staðfest í gjár.

Sambært lógunum um tunlarnar skal útveganarkostnaðurin, eisini partapeningurin, sum landið setti í feløgini, gjaldast aftur, áðrenn tunlarnir kunnu latast landinum.

Og gjaldið fyri at brúka tunlarnar er besta trygdin fyri, at tunlarnir verða hildnir viðlíka og dagførdir, stendur í ískoytinum til røðuna, sum løgmaður helt í tinginum í gjár, tá tingsetan 2018 byrjaði. 

Tað kostar eisini bara tríggjar krónur at brúka tunlarnar, tá gjaldið hjá haldarum fer niður mikudagin.

Tá lækkar gjaldið niður í 20 kr.

Tey, sum koyra til arbeiðis og heim aftur, fáa 17 kr. aftur í ferðastuðli, so hjá teimum er kostnaðurin tríggjar krónur.

Løgmaður segði í røðu síni, at umsitingin hjá P/f Vágatunlinum og P/f Norðoyatunlinum verður flutt úr Havn til Runavíkar á nýggjárinum.