Uppboðsølur í tinginum

Løgtingið fer í dag at viðgera tvey uppskot hjá Fólkaflokkinum um at taka skipanina at selja fisk á uppboðssølu av.

Annað uppskotið er um at strika heimildina hjá landsstýrismanninum í fiskivinnumálum at selja fiskirættindi á uppboðssølu.

Hitt uppskotið er um at strika heimildina at selja part av kvotunum á Flemish Cap.

Fólkaflokkurin sigur, at ein bati sæst hjá heimaflotanum, tí kvoturnar á Flemish Cap hækka. 

Men nú útlitini eru frægari, skal allur vøksturin takast frá heimaflotanum, tí sambært lógini kann landsstýrismaðurin selja 15 prosent av fiskirættindunum á Flemish Cap á uppboðssølu.

Fólkaflokkurin sigur, at uppboðssølan í nýggju fiskivinnulógini er fullkomiliga miseydnað. 

Skipanin elvir til ótryggleika, og at kalla øll vinnan hevur víst á, at uppboðssølan er eitt stórt afturstig í menningini, sum hevur verið í fiskivinnuni seinastu árini.

Uppskotini um at strika uppboðssøluna í fiskivinnuni verða viðgjørd undir einum á tingfundinum, sum byrjar klokkan 13.30.