Nógv fleiri vilja skifta kyn, bíðitíðin er long

Fleiri fólk í Danmark vilja skifta kyn.

Danskir miðlar siga í morgun, at fyri fáum árum síðani vóru tað tíggju fólk árliga, sum søktu um at skifta kyn - í dag er talið 200 fólk. Tað skrivar blaðið Jyllands-Posten.

Hetta hevur við sær, at bíðitíðin eftir viðgerð er longd munandi. Heimasíðan hjá Danmarks Radio skrivar, at bíðitíðin at sleppa framat serlækna kann vera eitt ár.

Síðani skulu fólk bíða í onnur tvey ár fyri at fara undir eina møguliga kynsskiftisviðgerð - og bíðitíðin bara veksur, skrivar Jyllands-Posten.

Politisku flokkarnir Enhedslistin, Alternativið og SF halda, at fleiri pengar skulu setast av, so bíðitíðin styttist, men í Dansk Folkeparti taka tey ikki undir við hesum.

Tey halda tvørturímóti, at talan er um eitt mótafyribrigdi - hetta at fara undir kynsskiftisviðgerð.

Løgfrøðligt skifti

Her heima er uppskot um løgfrøðiligt kynsskifti fyri í løgtinginum týsdagin. At skifta kyn løgfrøðiliga merkir, at tú søkir um at fáa eitt p-tal, sum samsvarar við tín kynsliga samleika, og hetta gevur tvørkyndum møguleika at velja sær navn samsvarandi samleika sínum, fáa nýtt samleikaprógv, koyrikort og pass, stendur at lesa í uppskotinum.

Løgfrøðiligt kynsskifti varð loyvt í Danmark í 2014. Danmarks Radio sigur, at síðani tá hava 918 fólk søkt um løgfrøðiligt kynsskifti, harav eru 692 umsóknir játtaðar.