Stórur áhugi fyri Heimafriði

Yvir 60 fólk vóru á stovnandi aðalfundinum hjá felagnum Heimafriði mánakvøldið.

Stóra undirtøkan er prógv um, at ljóð- royk- og ljósdálking frá skipum ávirkar og órógvar nógv fólk kring landið, sigur Heimafriður í tíðindaskrivi. 

Á fundinum bleiv endamálsorðingin hjá felagnum samtykt.

Endamál felagsins er at virka til frama fyri heimafriði og heilsubetri umhvørvi hjá fólki í Føroyum. 

Ótolandi larmur, ristingar, roykur og ljós frá skipum ella øðrum havnarvirksemi skal ikki sleppa at hava negativ árin á bústaðarøki í framtíðini. 

Í nevndina vórðu vald Trina Eysturoy, Sylvia Thomsen, Niels Midjord, Theodor E. Johannesen og Theresa Jákupsdóttir. 

Nevndin fer at skipa seg í næstum.