Tvær milliónir afturat til tunnilstoymið

Til tess at tryggja, at farast kann til verka so skjótt sum møguligt, er meirilutin samdur um at hækka játtanina til níggju milliónir krónur í 2019, tað vil siga við 2 milliónum krónum.

Eisini sigur meirilutin, at tríggjar milliónir verða settar av til viðlíkahald av tunlum og brúgvum.

Tvær milliónir verða settar av til at fyrireika tunnil úr Gøtudali til Skálabotn, fyri at leiða ferðsluna úr økinum norðan fyri Gøtueiði um Skálabotn og eftir vestara armi á Skálafjørðinum til Eysturoyartunnilin.

Løgtingið fer at hava aðru viðgerð av uppskotinum til fíggjarlóg fyri 2019 í dag. Uppskotið skal samtykkjast við triðju viðgerð, áðrenn løgtingið fer heim í jólafrí.