Formaðurin onga viðmerking um løgtingsmann

Aksel V. Johannesen, formaður í Javnaðarflokkinum, fæst ikki at siga, um hann vil, at Kristin Michelsen, borgarstjóri á Tvøroyri, nú velur borgarstjórasessin og fer úr løgtinginum.

Býráðið á Tvøroyri samtykti leygardagin, at Kristin Michelsen skal velja millum borgarastjórasessin og løgtingssessin.

Javnaðarflokkurin hevur ikki kunnað lovað hinum í samgonguni eins nógvar atkvøður og tingfólk floksins eru.

Men formaður floksins, sum eisini er samgonguleiðari, vil ikki siga, um hann vil hava Kristin Michelsen at fara úr løgtinginum.

Aksel V. Johannesen var í sendingini Fjúsi fyrrapartin.

Vit hava roynt at fingið orð á Kristin Michelsen í dag, men til fánýtis.

Men hann segði leygardagin, at hann fer at ráðføra seg við sín sakførara, áðrenn hann tekur nakra støðu. 

Kristin Michelsen tekur við aftur sum borgarstjóri í morgin, eftir at hava verið í feriu síðani fyrst í desember.