Borgarstjóri í Gdansk stungin niður og dripin

Túsundtals borgarar savnaðust í býum í Póllandi, tá tað í gjár frættist, at borgarstjórin í Gdansk varð deyður av løstunum, sum hann fekk, eftir at vera stungin niður á palli undir einum vælgerðartiltaki sunnukvøldið.

Í Gdansk savnaðust fleiri túsund fólk uttan fyri ráðhúsini, har Pavel Adamowicz arbeiddi sum borgarstjóri í meira enn 20 ár.

The Guardian skrivar, at formaðurin í Europaráðnum, Donald Tusk, sum er úr Gdansk, og sum var vinmaður og politiskur sameindur við Adamowicz, helt røðu.

- Góði Pawel. Tú noyddist at bíða so leingi, til hesa sorgarstund, fyri at síggja úr erva, hvussu nógv vinfólk tú hevur her í Gadansk, segði Tusk.

Dóttur Pawel segði eisini nøkur orð um pápa sín.

Adamowicz doyði í gjár eftir at hava verið undir skurði í meira enn fimm tímar sunnukvøldið.

- Vit kundu ikki vinna, segði pólski heilsumálaráðharrin.

Ein 27-ára gamal maður úr Gdansk, sum er gamal kenningur hjá løgregluni, er ákærdur fyri drápið. 

Hann varð leyslatin úr fongsli í síðsta mánaði. 

Eftir at hava stungið borgarstjóran, segði hann við fjøldina av fólki, at hann gav fyrrverandi flokkinum hjá Adamowicz skyldina fyri, at hann varð fongslaður í 2014 fyri fleiri harðskapstilburðir, skrivar The Guardian.