Byggja 27 íbúðir á Argjaboða

27 íbúðir skulu eftir ætlan byggjast á Argjaboða á Argjum í næstum. Tórshavnar kommuna hevur fingið umsókn frá einum privatum felagi um at byggja íbúðarhús við 27 íbúðum umframt einum felagshúsi.

Umsóknin er send Tórshavnar Kommunu, tí økið liggur í C3-øki, sum merkir, at tú einans kanst byggja, um tú hevur fingið eina serstaka byggisamtykt.

Tekniski stjórin og býararkitekturin hjá kommununi mæla til at góðkenna uppskotið at gera eina serstaka samtykt til økið, sum loyvir privata felagnum at byggja íbúðarhúsið, treytað av, at umsøkjarin fær loyvi at keypa lendið.

Og mikukvøldið tók eitt samt býráð undir við uppskotinum.

Nýggj kloakkleiðing gerast

Tær 27 íbúðirnar á Argjaboða eru 93 fermetrar hvør og hava trý kømur. Íbúðarbygningurin er umleið 14 metrar høgur og er í 4 hæddum - tríggjar hæddir við íbúðum og ein parkeringskjallari.

Økið er ikki egnað sum íbúðarhús, sum er. Eitt nú metir tekniska deild hjá kommmununi, at verandi kloakkleiðing í økinum, ikki klárar at taka ímóti spillvatni frá 27 íbúðum. 

Tvinnar eru loysnirnar. 

Antin má ein nýggj útleiðing gerast út á streymasjógv ella gera eina nýggja pumpuskipan, sum megnar at pumpa spillvatnið upp í leiðinginia, sum kemur frá útsykkingini undir Kongavarða, sum liggur nakað omanfyri.

"Talan er um lutfalsliga kostnaðarmiklar loysnir, og tað fyriliggja ikki neyv tøl júst nú", sigur Tekniska deildin hjá Kommununi.