Nakrar milliónir færri fyri umlættingarheim

Tað eydnaðist umsitingini hjá Tórshavnar kommunu at spara nakrar milliónir krónur, nú umlættingarheim skal byggjast við Rólantsgøtu í Hoyvík.

Heimið kostaði 84 mió. kr., men er nú farið beint undir 80 milliónir.

Fermetraprísurin er nú 37.000 kr., og tá er alt við.

Meirilutin í býráðnum samtykti fyri einum mánað síðani at samráðast við byggifelagið MT Højgaard um umlættingarheimið og endurvenjingarmiðstøðina í Hoyvík.

Ætlanin var millum annað at fáa prísin niður.

Málið var fyri aftur á býráðsfundi mikukvøldið og varð tá samtykt við átta atkvøðum.

Byggingin varð boðin út í innbodnari lisitasjón. 

Dómsnevndin metti, at MT Højgaard hevði besta tilboðið.

Hini feløgini, sum vórðu boðin við, vóru Húsavarðatænastan og Articon.