Sandoy Seafood fingið nýggjar eigarar

Fyri lítlari løtu síðani skrivaðu partarnir undir søluavtaluna, og Mowi - sum fyrr æt Marine Harvest - hevur selt virkini bæði í Skopun og á Sandi til eitt nýtt føroyskt felag, sum eitur Sjø hjá Óla og Ann-Dorit Nattestad. 

Tey áttu í danska reiðarínum Ruth saman við Gullak Madsen, men hann keypti Nattestad úr felagnum fyri eini tveimum árum síðani fyri fleiri hundrað milliónir.

Tey hava eisini eitt danskt felag, sum kallast Sjey.

Tað kom dátt við hjá teimum 60 starvsfólkunum á Sandoy Seafood, tá Mowi herfyri boðaði frá, at rakstur ikki fekst í virksemið, og at tey tí mistu sítt arbeiðspláss, sum skuldi lata aftur.

Síðani hava umboð fyri Arbeiðsloysiskipanina verið í Sandoynni og hjálpt fólki at lima seg inn og skriva umsókn um arbeiðsloysisstuðul, men eigaraskiftið í dag fer kanska at hava nýggjar møguleikar við sær fyri arbeiði í oynni.

Útvarpið hevur samrøðu við nýggja eigaran, Óla Nattestad í tíðindasendingini klokkan 18.