Smyril fær sínar pengar

Løgtingið viðger í dag uppskotið hjá Jørgeni Niclasen, landsstýrismanni, um eykajáttan til Smyril, sum er farin í dokk á Lindø skipasmiðjuni í Danmark.

Biðið er um 3,5 milliónir krónur í eykajáttan. Sambært Strandferðsluni skulu brúkast 29,5 milliónir krónur fyri at fylgja øllum krøvum frá klassanum.

Verða tey ikki fylgd, sleppur Smyril ikki at sigla. 26 milliónir krónur eru í fíggjarlógini fyri 2019 til dokkingina.

Útreiðslunoytralt

Tingfólk í andstøðuni vístu á, at eykajáttanin átti at verið útreiðslunoytral. Uppskotið er nú í Fíggjarnevndini, sum eisini fer at tosa um Prince, sum avloysir Smyril.

Løgtingið samtykti einmælt at geva frávik frá tíðarfreistunum á øllum viðgerðarstigum, so uppskotið um eykajáttan verður avgreidd í dag.

Næsti tingfundur er klokkan eitt í dag, segði løgtingsformaðurin. Tá skal Fíggjarnevndin koma við álitinum.