1. oktober fóru sáttmálanir hjá 15 fakfeløgum á almenna arbeiðsmarknaðinum úr gildi, og hósdagin í síðstu viku byrjaðu sáttmálasamráðingarnar, tá Starvsmannafelagið og lønardeildin hjá Fíggjarmálaráðnum fóru á fund.

Seinastu sáttmálasamráðingar fyri tveimum árum síðani, vóru merktar av trimum stórum verkføllum - hjá sjúkrarøktarfrøðingunum, námsfrøðingunum og ljósmøðrunum.
Men hvat kunnu vit vænta av komandi samráðingum, hvørjar eru avbjóðingarnar hjá samráðingarpørtunum at koma fram til nøktandi semjur fyri báðar partar, og riggar skipanin nóg væl?

Tosað hevur verið um at gera eina nýggja lønarskipan, men hendan er ikki komin á mál. Men hví er tørvur á einar slíkari og hvørjir eru vansarnir og fyrimunirnir.

Hetta eru millum spurningarnar vit viðgerða í hesum tematýsdagin í Nón um fakfeløg og sáttmálasamráðingar, har vit lýsa evni í fortíð, nútíð og framtíð.

Vit tosa við: Súna Selfoss, fomann í Starvsmannafelagnum, Ole Jensen fomann í Akademikarafelag Føroya og Óluvu í Gong forkvinnu í Felagnum Føroyskir sjúkrarøktarfrøðingar. Eisini kemur Jan Mortensen, samráðingarleiðara hjá lønardeildini í Fíggjarmálaráðnum, í útvarpsstovuna.

Helgi Eidesgaard, søgufrøðingur, sum í løtuni skrivar bók um Føroya Arbeiðarafelag, greiður frá um søguna hjá føroysku fakfelagsrørsluni, og avbjóðingar í dag og í framtíðini. Turið Debes Hentze, løgfrøðingur og mediator, umrøður tað at mekla, og eisini spyrja Johnny í Grótinum hvat løn er og hví lønin hjá ymsum stravsbólkum er sum hon er.