- Tá ið vit spurdu fólk, um vit eiga at gera nýggj orð fyri tøkuorðini, so svaraðu umleið tveir triðingar ja.

Føroyingar taka sum heild undir við purismuni. Hetta er ein av mongum áhugaverdum staðfestingum í nýggjari bók eftir Jógvan í Lon Jacobsen, sum nevnist "Purisma - føroysk orð ella orð í føroyskum."

Bókin snýr seg um føroyska purismu, bæði søguliga og samtíðarliga. Eisini er ein ástøðiligur partur um t.d. málvariatión, hugburð, normar og atlaging, umframt greiningar av trimum útvarpssamrøðum. Tann søguligi tráðurin gongur heilt aftur til tann klassiska retorikkin, tí vit síggja nøkur felags eyðkenni í retorikkinum og purismuni. Tann samtíðarligi parturin byggir í høvuðsheitum á kanningar um tøkuorð og nýggjyrði.

- Eg havi altíð havt áhuga fyri hesum evninum. Tað er ikki nógv skrivað um purismu. Tað eru nógv ár síðan eg byrjaði at viðgera hetta, sigur Jógvan í Lon Jacobsen, sum hevur undirvíst í purismu í nógv ár og tískil hevur granskað og fingið nógv tilfar til vega.

Sjálvur heldur Jógvan í Lon Jacobsen, at tað rúmkar málið, at tøkuorðini og nýggjyrðini - tað eru fremmandaorð og smíðað orð - liva lið um lið í málinum. Tað gevur møguleika fyri variatión, og at fólk laga málið til ta støðuna, tey eru í.

Hoyr alla samrøðuna við Jógvan í Lon Jacobsen her.