Meðan fleiri foreldur deila uppslag, sum ávarar um happing í fólkaskúlanum; so sigur ein lærari, at vit skulu ansa eftir ikki at ganga av verðina, bara tí ein næmingur hevur ein ringan dag ella keðir seg í tímanum.
Annika Restorff Holm, lærari í Lítlaskúla í Havn, hevur skrivað sítt ískoyti sum uppslag á facebook:

Nú byrja skúlarnir aftur og børn skulu í ein skúlaflokk at læra eina rúgvu. Fyrst og fremst skulu tey læra, at ALT ikki snýr seg um ein sjálvan, men at tey nú eru partur av einum felagsskapi har tað er umráðandi at lurta eftir øðrum, bæði vaksnum og børnum og tað ber tískil ikki til at hava orðið allatíð.

ALT fer ikki at ganga eftir vild allatíð og tað er heilt ok! Tað er eisini í lagi at verða keddur onkra løtu uttan at ringja heim eftir foreldrinum tá tú hevur fingið eitt skurðsl ella tá tú hevur gloymt eina bók, ella at tú fekk tað skeiva upp á matpakkan. Tað verður betur morgin!

ALT fer ikki at verða so øgiliga spennandi allatíð, og tað er heilt ok! Tað fer heilt sikkurt at koma fyri, at onkur løta verður, sum ikki er soo spennandi. Har skalt tú brúka tað sum tú vónandi hevur lært heimanifrá, hetta at taka atlit fyri øðrum og virða at tey ynskja at friðarligt er í tímanum tá tey lesa og arbeiða. Tað er umráðandi at læra at lesa kenslur og andlitsbrá hjá hvørjum øðrum og at seta egin mørk og finna og virða mørk hjá øðrum. Eisini skalt tú læra at siga frá hvussu tú hevur tað og tínar kenslur eru ongantíð skeivar! Tú ert akkurát sum tú skalt verða.

Eingin dugur alt- øll duga okkurt- hetta fara vit alt at læra!

Eisini skal lærast, at øll læring ikki fyrigongur á einum skermi, og tað onkurntíð er ein turrislig bók og ikki ein dansandi kúgv á einum Ipaddi sum myndar undirvísingina. Tað ber tíverri ikki til at” blaða” læraran burtur líkasum á Ipaddinum fyri síðani at trýsta á okkurt annað meira spennandi, so skjótt hann gerst ”keðiligur”. Lærarin er komin fyri at verða allatíð- tað er bara so 

Komið øll og tosið pent um skúlan, læraran foreldrini og børnini.

Kom og verið góð við hvønn annan virðið hvønn annan- við virðing basa vit happing

Ynski øllum eitt gott og læruríkt skúlaár