- Tíðindi, mentan og ítróttur
Nón
Hetta er ein heilt serligur leikur.
Tað sigur leikstjórin Guðjón Pedersen, leikstjóri á Portrettinum, sum hevur frumsýning á Tjóðpallinum leygarkvøldið.
Leikurin Portrettið er serstakur, tí hann setir persónar saman - Mikines, Kjølbro og Victor Danielsen - hóast teir ongantíð hittust. Ítøkiligi karmurin er læknastríðið í Klaksvík, men samtundis fæst leikurin við onnur meira eksistentiel fyribrigdi.
Tað er við einum ávísum virðingarótta, at Nicolaj Falck hevur átikið sær leiklutin sum Mikines. Og hann viðgongur, at sum tíðin er gingin, hevur hann livað seg heilt inn í leiklutin, eisini í gerandisdegnum.
- Eg eri uttan at vita av tí farin at skriða mær og hava somu hábrøgd sum Mikines, ið hevði psoriasis, sigur hann.
Leikstjórin er íslendingurin Guðjón Pedersen, sum eisini áður hevur leikstjórnað "Aftaná Undrið" eftir Jóanes Nielsen.
- Eg vóni, at vit fara at síggja ein tragiskan, stuttligan og eitt sindur løgnan leik, har alt kann henda. Leikurin snýr seg um síðstu 24 tímarnar í lívinum hjá Mikines, tá ið hann situr á einum sinnissjúkrahúsi í Keypmannahavn og gjøgnugongur ymiskt í sínum lívi. Er tað dreymur, er tað veruleiki, ella er tað bara fantasiur? Eg vóni, at vit hava fingið nógvar litir fram, sum er í leikritinum hjá Jóanesi, sigur Guðjón Pedersen.
Hann fegnast um at samstarva við leikritahøvundan, pallsmiðjin og leikararnar, sum øll hava havt sítt at siga fyri endaliga úrslitið.
- Tað góða við at samstarva við Jóanes er, at hann er púra opin fyri, at vit tulka og brúka hansara leikrit. Vit hava tosað nógv saman, og hann hevur eisini skrivað okkurt afturat í tilgongdini at skipa leikin, greiðir leikstjórin frá.
Hoyr alla samrøðuna við høvuðsleikaran og leikstjóran.
Guðjón Pedersen, leikstjóri (myndir: Tjóðpallur Føroya)