Tað var ein góð uppliving at arbeiða í Føroyum í fleiri mánaðir í samband við upptøkurnar til TROM. Tað heldur heimskendi, danski sjónleikarin Ulrich Thomsen, sum spælir Hannis Martinsson í sjónvarpsrøðini.

Hann arbeiddi í Føroyum í smáar fýra mánaðir meðan røðin var tikin upp, og at vera í Føroyum so leingi, gav honum eina breiðari mynd av landinum og fólkinum.

Ulrich THomsen vísur á, at tað sum ger TROM serstaka og forkunnuga í mun til aðrar krimirøðir, er júst tað, at hon er tikin upp í Føroyum.

"Vit hava ikki sæð nógv til Føroyar í filmum ella slíkum sjónvarpsrøðum fyrr. Vit hava sæð nógvar filmar og røðir úr eitt nú New York og LA, men ikki úr Føroyum. Júst tað at pallmyndin er føroysk, ger TROM áhugaverda fyri hyggjaran" sigur Ulrich Thomsen.

Hann heldur, at tað ber til at gera stórar filmsframleiðslur í Føroyum, men tað krevur enn betri útgerð og fleiri førleikar, og tí má økið raðfestast eisini politiskt.  

Lurtið eftir samrøðuni við Ulrich THomsen, har hann greiðir frá sínum upplivingum at í samband við upptøkurnar til TROM.

Røðin verður frumsýnd á Viaplay 13. februar, og í Kringvarpinum 17. februar.