Tey flestu kenna til sagnirnar um Húsfrúnna í Húsavík og kanska eisini Løgmansdóttirina á Steig, Elin Katrinu. Men nú hava hesar sagnarkvinnur fingið nýtt lív, tí Ingun Christensen hevur skrivað tvær skaldsøgur ætlaðar ungum, um hesar kvinnur.

Hetta eru tvær av fýra bókum, ið Ingun Christensen nú hevur skrivað við í kvinnusøgu okkara. Í 2017 kom skaldsøgan Annika í Dímun? út, í 2018 kom Katrin í Toftum?, ið eisini byggja á sagnir.

Tað er ein spennandi kanningarferð aftur í tíð, at skriva um sagnarkvinnur, sigur Ingun Christensen. Tì hóast stórur partur av lýsingunum í bókunum eru fiktión, so tryggjar Ingun sær, at so nógv keldutilfar sum gjørligt verður kannað, áðrenn hon fer í holt við søgurnar. Skaldsøgurnar eru sostatt grundaðar á bæði søguligt keldutilfar, sagnir og fólkatrúgv, og hetta ger søgurnar spennandi at lesa hjá nútímans børnum og ungum.

Húsfrúgvin í Húsavík snýr seg um Guðruna, ið er dóttir ein ríkan handilsmann úr Bergen og verður gift við einum føroyskum bónda. Guðrun er øðrvísi og illa lýdd á garðinum í Húsavík. Í Løgmansdóttrini á Steig verður Elin Katrina noydd at flýggja og krógva seg fyri skiparanum á einum fransaskipi, ið vil hava hana til konu. Í báðum førum eru tvídráttir millum hjarta, vilja og skil, spenningur og ein fangandi søga.

Tær báðar nýggjastu hevur Bjørk Jónheðinsdóttir Tróndheim hegnisliga myndprýtt.

Tað eru Bókadeild Føroya Lærarafelags og Nám, ið standa fyri útgávunum.