Skrá Sjón

Í Føroyum íðka 2.200 fólk hondbólt, og alsamt fleiri spælarar fara uttanlands at royna hondbóltseydnuna.

Tveir teirra eru tann 19 ára gamla, Rakul Wardum, og tann 16 ára gamli, Óli Mittún.

Rakul fór longu sum 16 ára gomul niður á Skanderborg Elite Håndboldakademi og spælir nú við Ajax í Keypmannahavn, og Óli Mittún skrivaði í mars í ár undir sáttmála við svenska meistaraliðið, Sävehoff.

Í sendingini greiða tey frá sínum dreymum um framtíðina og umrøða eisini tann longsul, sum kann gera um seg, tá ungfólk flyta burtur.

Uni Arge leggur til rættis og Mathias Dimon Næs setti saman.

Tjóðsangur okkara varð til fyrst í farnu øld. Símun av Skarði yrkti "Tú alfagra land mítt" á háskúlanum í Føgrulíð í 1906, og lagið smíðaði Petur Alberg í Havn árið eftir. Føroyingar fingu alt fyri eitt tokka til sangin, og tá ið Føroya Fólks Sangbók á fyrsta sinni kom út í 1913, stóð sangurin fremst í bókini. "Tú alfagra land mítt" hevur kortini ongantíð fingið formligt gildi sum almennur tjóðsangur. Í nógv ár høvdu "Tú alfagra land mítt" og "Eg oyggjar veit" støðu sum føroyskir tjóðsangir á jøvnum føti, men sum frá leið vann "Tú alfagra land mítt" á hinum. Í nýggju sendingini "Streingir, ið tóna", verður sagt frá um tjóðsangin og menninar, ið gjørdu hann fyri meira enn hundrað árum síðani. Turið Sigurðardóttir, Sunleif Rasmussen, Hanus Kamban, Ólavur Hátún o. o. siga frá og meta um.
Suni Merkistein og Hans Petur Hansen leggja til rættis.

At Føroyar hava vunnið sær rættin til egið flagg, er ikki komið av sær sjálvum. Merkið varð sum kunnugt viðurkent sum alment føroyskt flagg í 1940, og seinni staðfest í Heimastýrislógini í 1948, men stríðið fyri flagginum var drúgt. Tað vóru føroyskir studentar í Keypmannahavn við Jens Olivur Lisberg á odda, sum tóku stig til flaggið. Føroyingar fingu beinanvegin tokka til studentaflaggið, og brátt varð veittrað við tí á fólkafundum í Føroyum. Men tað er ikki fyrr enn skipini fara at sigla við tí, at stríð tekur seg upp við donsku myndugleikarnar. Tað kemur til skarpskeringar Føroyar og Danmarkar ímillum eftir flaggøluna á Tingvøllum í Íslandi í 1930 og íkki minni á ólavsøku sama ár. Tá ið Seinni Heimsbardagi brestur á og bretar herseta Føroyar, er flaggspurningurin vorðin brennandi heitur. Samstundis sum danskir og bretskir myndugleikar umrøða støðuna fylkjast føroyingar í stórum um kravið at vinna flagginum viðurkenning. Søgan um flaggið er eisini søgan um studentaútisetar við romantiskum hugsjónum, um eljustríð og lagnur, um djarvar og stoltar sjómenn, um sjálvstýrisstríð og eina ríkisrættarliga støðu í hóttafalli.

Suni Merkistein og Hans Petur Hansen leggja til rættis.

Í apríl í 1912 fer stóra marglætisskipið Titanic á sína fyrstu lagnutungu ferð. Á ferðini verður 17 ára ríkmansgentan, Rose, forlipt í tí fátæka og knáa Jack, sum hevur vunnið ferðaseðilin í kortspæli. Hvørgin teirra hevur varhugan av, at "skipið, sum ikki kundi søkka" hevur kós móti vanlukkuni. Filmurin fekk ikki færri enn 11 Oscar virðislønir.
Leikarar: Jack Dawson: Leonardo DiCaprio. Rose DeWitt Bukater: Kate Winslet. Cal Hockley: Billy Zane. Molly Brown: Kathy Bates.
Leikrit og leikstjórn: James Cameron.