- Vit bíða bara og vita, hvat næsta stigið hjá Putin verður

Rannvá Egholm
rannva@roddin.fo

- Tað hevur altíð verið nakað ringt og negativt, tá onkur hevur verið samkyndur í Russlandi. Eisini hevur tað verið flóvisligt, og gentur og dreingir hava aldri viljað víst teirra seksualitet. Familjur hava eisini sæð tað sum ein stóra skomm, tá ið dóttirin t.d. ikki dámar dreingir, men heldur vil vera saman við einari gentu. Sjálv kenni eg eingin samkynd í Russlandi - ella møguliga tora tey bara ikki at vísa tað, fortelur 19 ára gamla Nadia Ermkova, ið býr í Kazan Tatarstan í Russlandi.

Núverandi støðan í Russlandi er skelkandi fyri allan heimin, og eingin bati er at síggja. Støðan hevur við sær, at nógvur hatur verður vendur ímóti samkyndum, tvíkyndum og transkyndum, og fólk nýta hesa anti-LGBT lóggávuna sum umbering fyri at gera seg inn á fólk og alt LGBT-virksemi.

- Øll, ið eg kenni, finnast harðliga at hesar lóggávuni, tí hetta er bara slett ikki menniskjasligt. Eg og míni vinfólk eru øll samd um, at mann eigur at sleppa at gera tað, ið mann hevur hug til, og fólk skulu hava frælsi - men hesum er tað eldra ættarliðið ikki ordiliga samt í. Tey eru nøgd við lóggávuna.

Nýggja lóggávan ger tað ólógligt at útala seg um rættindini hjá teimum samkyndu, at gera mótmælisgongur, at gera LGBT-skrúgongur (Pride Parade) og at geva ómyndigum upplýsingar um LGBT. Brot á lógina kann føra til 2 vikur í varðhaldi ella eina bót á 130.000 krónur. Og hendan revsingin er ikki bara galdandi fyri russar, men ferðafólk kunnu eisini verða blakað úr landinum, um tey gera brot á lógina. Fyrr í august, sambært pinknews.co.uk, gingu tíðindi um, at Alexander Mikhailov, ið er limur í russiska parlamentinum, royndi at innføra eina lóg, ið fór at gera tað møguligt at píska fólk við øðrum seksualiteti á almennum torgum.

- Fyri nøkrum fáum vikum síðan fóru Putin og kona hansara (nú fyriverandi) frá hvørjum øðrum, og tað er ikki nakað loyndarmál her, at Putin nú svevur við einari nógv yngri kvinnu. Skilir tú, Putin hugsar slett ikki um familju, og so ger hann brádliga eina anti-LGBT propaganda lóg. Eg skilji einki. Hendan støðan er øll, sum hon er, fullkomiliga hol í høvdið, sigur Nadia.

- Í Russlandi er tað, tíverri, soleiðis, at tað slett ikki er vanligt ella nakar siður at gera uppreistur og mótmælisgongur. Øll eru onkursvegna bangin fyri forsætisráðharranum og stjórnini. Tí bíða vit bara og vita, hvat næsta stigið hjá Putin verður.