Greta aktuell við vakrari balladu um mánan

Við sermerktu kláru rødd síni ognar Greta Svabo Bech nýggjasta lag sítt til mánan. Lagið ber heitið Brave Moon og kann takast niður ókeypis.

Samstundis sum hon gevur nýggja lagið út, boðar Greta frá, at nógv er á skránni komandi ár. Hon fer tá undir eina eitt ára langa verkætlan, sum skal úrslita í einari konseptútgávu. Fløgan byggir á ringrásir, árstíðirnar, tíð náttúru, broyting og lívið og verður býtt upp og útgivin í einari EP fyri hvørja árstíð. Fyrsta EPin verður givin út síðst í mars.

Greta nýtir eisini høvið at líta aftur á árið, ið fór:

- So vit eru komin inn í desembur: Árið er næstan komið at enda. Vanliga er hetta tann tíðin av árinum, tá eg hugsi um, hvar eg var somu tíð í fjør og byrji at hugsa um, hvar eg vil vera somu tíð næsta ár. Um hetta mundið í fjør, satt at siga vikuskiftið, tá eg fylti 25, floymdu mítt heim og studio yvir, og eg sá tað sum eitt tekin um at gera okkurt nýtt, skrivar Greta Svabo Bech á Facebook

Hon tók í summar avgerðina at flyta aftur til Føroya eftir at hava búð í Liverpool í fleiri ár. Saman við sjeikinum Fred, sum framleiðir tónleik hennara, hevur Greta bygt sær eitt studio í Miðvági, og sigast kann, at nógv er hent seinasta árið. Hon hevur m.a. selt eitt lag til amerikonsku poppdrotninga Cher, gjørt eitt lag fyri kenda komponistin Ludovico Einaudi og givið fleiri løg út sjálv.