90ara elektroball og norskur indiepoppur á G!

Við hendinga sólglottum er føroyska summarið komið, og hetta merkir, at festivalsesongin er byrjað. Hóast einans tvær vikur eru til G!, er endaliga skráin framvegis ikki almenn, og í dag kunngjørdi festivalurin tvey nýggj nøvn.

Hóast hon bert er 22 ár, hevur danska Mendoza vakt ans á fleiri frontum í kreativa umhvørvinum í Keypmannahavn seinastu árini m.a. sum myndakvinna, bloggari, stylist og partur av diskarahópinum SlumBlogMillonær. Í 2013 gav hon út sítt fyrsta staklag, Love druggie, og síðan tá hevur tað gingið við rúkandi ferð. Mendoza hevur hitað upp fyri m.a. Fallulah og Lucy Love og vitjaði eisini á Apollo-pallinum, tá ið Brynjolfur spældi á Roskilde festivalinum mánadagin. 

Hin bólkurin, ið G! festivalurin avdúkaði í dag, eru norsku The Fjords. Her er talan um vakran og atmosferiskan indiepopp úr Norðurnoregi. Bólkur gav fyrr í ár út fyrstu EP sína, og bæði NRK og Gaffa lótu væl at útgávukonsertunum. Ein av teimum fýra limunum í bólkinum er føroyski Bárður Reinert Poulsen.

Afturat Mendoza og The Fjords hevur G! hesa vikuna eisini kunngjørt bólkarnar Lydmor, Kaleo, Tuxedo Rebels, Vágaverk og Sister Sledge.