Hvat, hvar og hví?

Hvat lesur tú?

Eg lesi ‘Sozialwissenschafen’; ein blanding ímillum samfelagsfrøði og stjørnmálafrøði. Mær dámar væl fakið, tí at tað er víðfevnandi og gevur mær tí nógvar møguleikar eftir loknan lesnað.

Eisini er tað í stóran mun upp til hvønn einstakan, hvussu skemaðið sær út. Hetta merkir, at kjakini í tímunum eru sera spennandi, tí at næmingar hava ymsar bakgrundir, og ymiskt er, hvussu langt vit eru komin í lesnaðinum.

Hvar lesur tú?

Eg lesi á Humboldt Universität í Berlin. Her henda altíð nógv spennandi ting, men kortini eru fólk sera avslappað og minna ofta um føroyingar. Berlin er ein internationalur býur, ið ger hann sera hugtakandi, og so er tað heldur ikki verri, at her er bíligt at liva.

Hví valdi tú just hetta?

Eg flutti til Berlin fyri at læra flótandi týskt. Eg tók nøkur málskeið, búði saman við týskarum og arbeiddi eitt sindur fyri at røkka mínum máli. Aftan á vildi eg fegin verða verandi í Berlin og lesa okkurt, ið hevði við samfelagsfrøði at gera.

Eg valdi Humboldt Universität, tí mær dámdi best samansetingina av fakum, sum tey bjóða. Og ein fyrimunur var eisini, at Humboldt, í mun til hini universitetini, liggur mitt í Berlin.