Nýtt og ungt á G!

Tveir nýggir føroyskir bólkar við ungari manning eru komnir aftrat á skránna til ársins G! festival.

Bólkarnir, sum í gjár og í dag eru kunngjørdir, eru Punjab og Ranchus. 

Punjab

Punjab er ein bólkur, mannaður av seks sera dugnaligum ungum monnum, sum spæla blues inspireraðan, alternativan funk-rokk tónleik. Bólkurin hevur seinastu tíðina arbeitt við fyrstu útgávuni, sum kallast "Flying Elephant". Løgini eru øll send til ljóðblandan, og bólkurin ætlar at fáa fløguna út áðrenn G! 2015. 

Við í bólkinum eru Matthias Kjølbro á saksofon, Árni Johannesson á sangi, Tórði Dam Jacobsen á trummum, Robert Bjarnason á gittar, Kári Fossaberg Ellingsgaard á bassi og Kristian Pauli Ellefsen á ljómborðum. 

Ranchus

Ranchus er ein eksperimenterandi rokk bólkur, sum er mannaður av Sigmundi Zachariassen á sangi og klaver, Ólavi Skipagøtu á bass, Hans Andriasi Gregoriussen á trummum og Sjúrði Samuelsen á gittar. 

Eisini eru Ranchus skjótt úti við fyrstu plátuni "Feeling Like A Caged Lion Pacing Behind One Way Glass", sum kemur út 24. apríl 2015.