Franka og Sissal á G!

© Gunnhild Persson

G! Festivalurin var við, tá Sement finalan var í Reinsarínum herfyri. Sum vant valdi festivalurin ein bólk millum finalistarnar at spæla á festivalinum. Valið fall á Sissal, ið endaði á einum samlaðum øðrum plássi í kappingini. 

Sissal flutti heim til Føroya í 2012 eftir eitt ár á tónleikaskúla í London. Hon fór undir at samla tónleikarar í ein bólk at spæla teir sangir, sum hon tá hevði skrivað. Bólkurin hevur ment seg nógv seinastu trý árini, nakrar útskiftingar hava verið í manningini, og ljóðið er spakuliga vorðið teirra egna. Teimum dámar væl at royna seg fram og at eksperimentera. Sissal við røddini og tekstunum, og tónleikararnir í samanspælinum teirra millum. Alt við tí endamáli at bera fram eina søgu, har tað ektaða merkist. Huglagið er ofta melankolskt og ferðast eitt sindur ímillum tað heilt friðarliga, droymandi og tað rokkuta.

Í bólkinum eru:

• Sissal Grækarisdóttir Magnussen - rødd
• Ólavur Gaard - gittar
• Árni Jóhannesson - bass
• Kristian Pauli Ellefsen - tangentar
• Hjørtur Pætursson Háberg - trummur

Franka

© Sonja Wang Hansen

Franka er oddakvinnan í bólkinum og spælir elektroniskan tónleik. Tónleikurin er melodiskur, men dregur elementir úr bæði poppi og avant garde. Onkuntíð er tað myrkt og speglar fortíðina hjá songkvinnuni í punk verkætlanini Helena Murr Murr, og aðrar tíðir er tónleikurin lívligur og festligur. 

Franka fevnir víða, og tónleikurin kann tykjast fjølbroyttur, men eyðkenda røddin knýtir alt væl saman.