Hugleiðing: hví gera nýggjárslyfti, ið ikki fara at halda?

Eg havi ongantíð skilt, hví fólk gera sær nýggjárslyfti, ið eru mest sum ógjørlig at gjøgnumføra. Nógvir fordómar eru mótvegis nýggjárslyftum, og tískil havi eg ongantíð tímað at spilt tíð upp á at gera tey.

Gerandiskvinnan ætlar sær at venja hvønn dag í nýggja árinum, "business"-pápin ætlar sær at arbeiða helvtina so lítið, sum hann gjørdi farna árið ... og so framvegis. Men hví seta sær órealistisk mál ár eftir ár?

Ein kanning gjørd í 2014 vísti, at bert 10% av fólki klára at gjøgnumføra hesi lyfti, sum tey hava sett sær til nýggja árið.

Trupulleikin er ikki at vit seta málini, trupulleikin eru málini, ið vit seta okkum. "At tapa meg," stendur ovast á flestu listunum, men av teimum, ið megna at tapa seg, eru tað bert 5-10% av fólkunum, ið megna ikki at taka uppá aftur.

Hvussu seta vit okkum so mál, ið ikki eru alt ov trupul at fremja? Jú, heldur enn at siga: "eg tapi meg 15 kilo í 2016," er skilabetri at seta sær fleiri smærri lyftir sum: "eg eti bert søtt ein dag um vikuna," "eg fari at venja x ferðir um vikuna". Tað verður stuttligari, lættari og størri møguleiki fyri at tú heldur tíni lyfti, um tú setur lítlar ætlanir, hvussu tú gjøgnumførir tey.

Les eisini: 9 venjingarráð

Hóast eg ongantíð havi skilt, hví mann bíðar eftir nýggjá árinum, áðrenn mann ger broytingar í sínum lívi, havi eg gjørt nøkur lyfti sjálv:

- Brúka minni pengar

... upp á ting, ið mær als ikki nýtist. Til dømis vatnfløskur og mentos í kantinuni í Hoydølum.

- Banna minni

Eg fari í hvørtfall at royna, men eg lovi einki.

- Leggja gerandisdagin betur til rættis​

2016 verður árið, har eg ikki byrji at gera heimaarbeiði 2 tímar, áðrenn tað skal latast inn.

- Nýta minni tíð á sosialum miðlum

- Drekka meira vatn

- Taka færri myndir

av tingum, ið ongan týdning hava.

- Taka fleiri myndir

av tingum og løtum, ið hava týdning.

- Ferðast í egnum landi

- Síggja allar Harry Potter filmarnar

Hvørji eru tíni nýggjárslyfti?