Summarmorgun

- Fyri meg er tað ikki ein mótsetningar at vera lækni og tónleikari, tí eg altíð havi fingist við bæði. So fyri meg er tað bara soleiðis sum gerandisdagurin er.

Konni Kass, tónleikari og lækni, kemur í dag út við einari nýggjari LP, fløgu og talgildari heildarútgávu, sum nevist Diplopia.

Diplopia er eitt læknaligt hugtak, sum merkir dupultsjón, og heitið verður brúkt sum ein tvítýdningur. Tað sipar til, at har eru mótsetningar í sangskrivingini, við tað at helvtin av løgunum eru myrkari og tyngri, og hin helvtin ljósari og lættari. Samstundis kann medisinska heitið sipa til lívsstøðuna hjá Konni Kass sjálvari, tí hon bæði hevur valt læknayrkið og tónleikin til sítt lívsyrki:

- Eg havi tørv á báðum fyri at vera heil. Tað er sjálvandi nokk so langt frá tónleikaheiminum, har tú skalt royna at fordjúpa teg, til at vera til arbeiðis á skaðastovuni og fylgja algoritmunum har, sigur Konni Kass, sum heldur at tað gevur henni nakað serligt, bæði til tónleikin og læknastarvið, at hon gongur í báðum heimunum.

Diplopia er onnur útgávan hjá føroyska sangaranum, saxofonleikaranum og sangskrivaranum. 11 løg eru á Diplopia, og í næstum fer Konni saman við sínum fasta bólki á konsertferð í Danmark við útgávuni.

Hoyr alla samrøðuna við Konni Kass her.