Hægstirættur í USA loyvir homo-hjúnabondum

Amerikanski hægstirætturin hevur júst avgjørt, at samkynd sleppa at giftast í øllum 50 statunum í USA. Av teimum níggju hægstarættardómarunum atkvøddu fimm fyri og fýra ímóti eini boyting av hjúnabandslógini. Áðrenn vóru homo-hjúnabond bert loyvd í 36 statum. Hetta skrivar Information.

- Avgerðin um homo-hjúnabond er eitt stórt stig móti javnrættindum, skrivar amerikanski forsetin, Barack Obama, á Twitter.

Í juni mánaða 2013 avgjørdi amerikanski hægstirættur, at ein ikki kann definera hjúnabandið sum bara verandi ímillum mann og kvinnu. Hetta viðførdi, at samkynd kundu fáa somu rættindi sum hinkynd. Tó var tað upp til hvønn einstakan stat, um hjúnaband millum samkynd var lógligt. Men nú er avgjørt, at øll samkynd í USA sleppa at giftast.