- Lær næsta ættarliðið at forrita

Vit eiga at gera forritan til eina lærugrein í fólkaskúlunum, heldur 20 ára gamli Bogi Napoleon Wennerstrøm, sjálvlærdur forritari, soleiðis, at vit kunnu koma eitt fet fram um onnur lond.

- Tað eigur at bera til at gera forritan til ein veruligan ídnað í Føroyum. So kæru politikkarar, mentamálaráðið og onnur, ið kunnu ávirka: lær næsta ættarliðið at forrita!

Forritan inniber í stuttum tað at gera appir, telduforrit, spøl osfr.

Bogi vísir til spurning/svar heimasíðuna Stack Overflow, ið inniheldur eina ørgrynnu av hagtølum innan forritan, so sum hvussu nógvir forritarar eru, og hvussu nógvar kvinnur arbeiða við at framleiða appir.
Hann er argur um, at Føroyar als ikki eru á nøkrum hagtølum hjá Stack Overflow.

- Vit vita øll, hvønn veg heimurin fer. Vit hava tvey stór ráevni í Føroyum: fisk og vitan. Lat okkum nýta tann seinna partin meir, sigur Bogi.

Bogi vísir á, at tað gerst meira og meira greitt, at forritan og tøkni sum heild kunnu hava stóran fíggjarligan týdning fyri eitt land. Eitt dømi er fyritøkan Samsung, sum í dag er so stór, at hon er 14% av bruttotjóðarúrtøkuni í Suður Korea.

- Vit hava í dag uml. 7,1 mia. fólk í heiminum. 6,8 mia. hava eitt hald hjá einari telefyritøku. Hví vísa vit blinda eygað til hendan risa marknaðin?