- Tíðindi, mentan og ítróttur
Ger kemisk vápn klár
<div>Deildir hjá Bashar al-Assad forseta í Sýria eru farnar undir at gera kemisk vápn klár at brúka í stríðnum móti uppreistrarfólkunum, sigur ein høgtstandandi sýriskur herovasti, ið er flýddur úr landinum.
</div><div>-Stjórnin er í ferð við at flyta kemisku vápnagoymslurnar og umskipa tær, so tær eru klárar at taka í brúk, sigur Mustafa Sheik generalur.</div><div>Fyrrverandi sýriski sendiharrin í Irak, Nawaf Fares, ið eisini er rýmdur, segði fyrr í vikuni, at stýrið er til reiðar at brúka kemisk vápn, og at tey møguliga longu eru brúkt í býnum Homs.</div><div>- Eg eri fullkomuliga sannførdur um, at stjórnin fer at brúka kemisk vápn, um sýriska fólkið økir trýstið á stjórnina uppaftur meira, segði hann í eini samrøðu við bretska BBC.</div><div>16 mánaðar langa stríðið og borgarakríggið í Sýria er nú hert munandi. Harðir bardagar hava seinastu vikuna verið millum uppreistrarherin og herin hjá Assad forseta fleiri staðni í høvuðsstaðnum Damaskus, og mikudagin drap ein bumba fýra av nærmastu stuðlunum hjá Assad, teirramillum svágur hansara, verjumálaráðharran og trygdarleiðaran.</div><div>Minst 100.000 sýriskir hermenn eru rýmdir úr herinum, ið tilsamans telur 320.000 mans. Teirramillum eru fleiri høgtstandandi herovastar, ið eru farnir í part við uppreistrarfólkunum.</div><div>Fleiri fráboðanir eru komnar um, at Assad er farin úr Damaskus, men tær eru ikki alment váttaðar. </div>
