- Tíðindi, mentan og ítróttur
Málið um skrásetingargjaldið í Hægstarætti í dag
<div>Nú klokkan níggju fer Hægstirættur at viðgera málið um meirvirðisgjaldið av skrásetingargjaldinum fyri bilar - málið, sum kann fara at kosta landskassanum meira enn 100 milliónir krónur. TAKS tapti í Føroya rætti beint fyri jól í 2009, men vann so í Landsrættinum í januar í 2011.</div><div><br></div><div>Kjarnin í hesum máli er, sambært Bjørn á Heygum, sum slapp í Hægstarætt við málinum, um tað almenna kann krevja gjøld, sum ikki standa í nøkrum lógarteksti. Sambært sjálvari grundlógini er tað ólógligt at krevja skatt og avgjøld uttan tað er lógarfest, sigur Bjørn á Heygum. </div><div><br></div><div>Í hesum ítøkiliga málinum er talan um meirvirðisgjald av skrásetingargjaldi fyri bilar, 12.201, sum vórðu keyptir árini 1999 til 2005. Eystari landsrættur segði tann 19.januar í fjør, at TAKS gjørdi ikki nakað skeivt. </div><div><br></div><div><b>Landsrætturin: Mvg í lagi</b></div><div><br></div><div>Hóast lógarbroytingin í 1999 sambært Landsrættinum ikki sigur, at heimild er at krevja mvg av skrásetingargjaldinum, er eingin ivi um hetta í forarbeiðinum til lógarbroytingina. Innkrevjingin var í lagi, tí tað ætlaði løgtingið, segði Landsrætturin.</div><div><br></div><div>Eingin ivi er tó um, at ivi var um heimildina, sum kom í 1999, og tí varð lógin broytt aftur í 2005 fyri at sleppa undan hesum iva. Tapir TAKS í Hægstarætti, noyðist landskassin í ringasta føri fyri hann at rinda aftur meira enn 100 milliónir krónur í meirvirðisgjaldi áv skrásetingargjaldi.</div><div><br></div><div>Tað veldst um nøkur fyrningarfreist verður galdandi. TAKS tapti í Føroya rætti beint fyri jól í 2009, men tá gjørdi fyrningarfreistin, at landskassin slapp nógv lættari enn tær stívliga 100 milliónirnar. </div><div><br></div><div><b>Hvør skal gjalda?</b></div><div><br></div><div>Ein annars spurningur í hesum rættarmáli er, um fólk eiga at krevja bilasøluna eftir meirvirðisgjaldinum, ikki TAKS, uttan tá bilasølan ikki er til longur, tá ber til at fara beina leið til TAKS. Bilasølurnar, sum leggja út fyri TAKS, fáa so pengarnar aftur frá TAKS. </div><div><br></div><div>Landsrætturin segði nei, tí kravda meirvirðisgjaldið var í lagi. Vanliga fellur Hægstirættur dóm eina viku eftir viðgerðina. Talan er um sokallað royndarmál. Tapir TAKS, so eru nøkur hundrað onnur mál á veg í Føroya rætt við dóminum hjá Hægstarætti sum grundarlagi. </div><div><br></div><div>Fyrsta deild hjá Hægstarætti, sjey dómarar, viðger málið á Hotel Føroyum. Men báðar deildirnar, allir 19 hægstarættardómarar hava verið á kunningarferð í Føroyum hesa vikuna. Hetta er fyrstu ferð í søguni, og tann søgan er long, 350 ár, at Hægstirættur er í Føroyum.</div><div><br></div><div> </div><div><br></div>
