ÍF er oddalið

Við sannførandi sigri á NSÍ, samstundis sum EB/Streymur spældi javnt móti KÍ, hevur ÍF lagt seg á odda í Effo-deildini

ÍF úr Fuglafirði er oddalið í landskappingini í fótbólti hjá monnum, nú trý umfør eru eftir av kappingini

16.09.2012 - 18:07

24 umfør eru nú spæld av landskappingini í fótbólti hjá
monnum, og nýggja oddaliðið eitur nú ÍF. Fuglfirðingar gjørdu sína skyldu í
Fuglafirði, tá teir vunnu 3-1 á NSÍ. Toppskjúttin í Effodeildini, Clayton
Soares heldur áfram við síni málskjóting, og hann skoraði øll trý málini móti
runavíkingum. Málið hjá NSÍ skoraði Pól Jóhannus Justinussen.

Við Margáir megnaði EB/Streymur bert at fáa javnleik í
einum tøttum og undirhaldandi dysti í móti KÍ. Arnbjørn Hansen legði heimaliðið
á odda í fyrsta minuttinum, meðan Andy Olsen stóð fyri útjavnandi málinum hjá
KÍ í seinna hálvleiki.At úrslitini hjá ÍF og EB/Streymi lagaðu seg soleiðis ger, at ÍF fer fram um EB/Streym í kappingini um at gerast føroyameistarar 2012. Liðini hava bæði 49 stig, men málúrtøkan hjá ÍF er betri.

Í Gundadali vann HB greitt 4-0 móti B68, sum tískil
verður liggjandi undir niðurflytingarstrikuni. Málini hjá HB skutu Kristin og
Christian R. Mouritsen. Øll málini komu í seinna hálvleiki.

Í Trongisvági spældu TB og Víkingur javnleik 2-2. Gilli
Sørensen legði heimaliðið á odda, stutt eftir dystarbyrjan, meðan Kaj Leo í
Bartalsstovu fyrst javnaði fyri gestirnar, og síðani legði Hjartvard Hansen
gestirnar á odda 1-2, áðrenn tað stutt fyri hálvleik eydnaðist Gilla Sørensen
enn einaferð at skjóta bóltin í málið til endaliga úrslitið 2-2.

Fimti og seinasti dysturin í Effodeildini hesuferð varð
spældur í Gundadali leygardagin, har B36 vann 3-1 á FC Suðuroy. Málini hjá B36
skutu Jákup á Borg, Karl Martin E. Danielsen og Lukasz Cieslewicz, meðan John
T. Poulsen átti málið hjá suðuroyingum.

25. umfar verður spælt um eina viku, og tá hittast liðini
soleiðis:

FC Suðuroy - HBNSÍ - TB

KÍ - B36

B68 - ÍF

Víkingur - EB/Streymur