Ísland fordømir ES fyri revsitiltøkini

Íslendski fiskimálaráðharrin, Sigurður Ingi Jóhannesson, sigur við Morgunblaðið, at stjórnin hevur samstarv við landsstýrið um málið.

Fríggjadagin heitti íslendska stjórnin á ES um at taka aftur hóttanirnar móti Føroyum og Íslandi um handilsforðingar.

Mótmæltu harðliga

Í hvassorðaðu fráboðanini mótmælti íslendska stjórnin harðliga framferðarháttinum hjá ES. Íslendska stjórnin vísti á, eins og landsstýrið, at sambært altjóða lóg skulu lond leggja seg eftir at loysa trætur sínámillum á friðarligan hátt og ikki við hóttanum og atgerðum sum teimum hjá ES. Íslendska stjórnin heitti staðiliga á ES um at taka hóttanirnar aftur og halda tær skyldur, ES hevur bundið seg til sambært altjóða rætti.

Sett í gildi kortini

Men í gjár boðaði ES frá, at nú koma handilsforðingarnar móti sild og makreli úr Føroyum. Og ES er av álvara farið undir at fyrireika tiltøk móti makreli úr Íslandi.

Íslendski fiskimálaráðharrin sigur, at ein íslendskur-føroyskur arbeiðsbólkur kannar, hvørji stig, londini bæði kunnu taka móti ES.

Andsøgn

Sigurður Ingi Jóhannesson vísir á andsøgnina í tí, at samstundis sum ES játtar at samráðast við Ísland og Føroyar, hóttir ES londini við øllum illum. Hann sigur eisini, at nú ES loypir á Føroyar og seinni fer at seta tiltøk í verk móti Íslandi, eigur ES eisini at revsa Russland fyri at fiska ov nógvan makrel.

Russland hevur eisini ásett sær egna makrelkvotu, sum er størri enn Russland eigur sambært býtislyklinum hjá strandarlondunum.

Ongin fráboðan frá Noregi

Norska stjórnin hevur ikki enn kunngjørt, hvat hon fer at gera, nú ES-tiltøkini móti Føroyum koma í gildi um eina viku. ES og Norra standa saman móti Føroyum og Íslandi í makreltrætuni. Í sildatrætuni eru Føroyar einsamallar móti hinum strandarlondunum.