Grønland í parti við Føroyum móti ES

Grønland er eisini strandarland í Norðuratlantshavi og vil hava samstarv við Føroyar og Ísland um makrel og sild.

Tað sigur grønlendski fiskimálaráðharrin, Karl Lyberth, við blaðið Sermitsiaq. Og Grønland er í parti við Føroyum og Íslandi móti ES, og tá eisini Danmark, og Norra.

Grønland ikki góðkent

Men hvørki Føroyar ella Ísland góðkenna Grønland sum strandarland, tá makrelur og sild skulu býtast millum londini. Tað gera ES og Norra heldur ikki.

Hóast Grønland ikki er góðkent at vera strandarland, hevur Grønland fiskað makrel í trý ár og í ár eisini sild við Eysturgrønland. Talan er um royndarveiðu. Talan er um veiðu í egnum sjógvi, og hana kunnu onnur lond einki gera við.

Strandarlondini eru í einari aðrari støðu enn Grønland, tí tey eru við í einari avtalu millum strandarlond um í felag at umsita fiskastovnar, sum ferðast tvørtur um fiskimørk.

Halda fram við royndarveiði

Karl Lyberth, landsstýrismaður, sigur við Sermitsiaq, at Grønland kann halda fram við sínari royndarveiðu í nøkur ár afturat til landsstýrið veit, hvussu stóra kvotu, Grønland eigur og síðani kann krevja sum strandarland.

Í fjør noktaði Ísland, at makrelur úr Grønlandi kundi landast í Íslandi. Men hetta forboðið er ikki galdandi í ár.