Kunnu nú eisini selja fisk í Vjetnam

Verksmiðju- og fyrstiskipini, Norðborg, Christian í Grótinum, Akraberg og Anita hava nú eisini fingið loyvi at selja fisk og framleiða fiskaúrdráttir til vjetnamska marknaðin.

Vjetnamski heilsufrøðiligi myndugleikin, Nafi-qad, hevur góðkent tey fýra skipini. Síðani august 2010 eru tilsamans 24 føroysk fiskavirki og skip góðkend at framleiða til vjetnamska marknaðin.

Stórur áhugi

Sambært Heilsufrøðiligu starvsstovuni veksur talið á heilsuváttanum til Vjetnam og til Kina støðugt. Í Íslandi eru sjey skip og virki góðkend at flyta fisk, skeljadjór og vørur av hesum inn á vjetnamska marknaðin.

Í Grønlandi eru tey 42, í Danmark 22 og í Noregi eru ikki færri enn 205 virki og skip góðkend til vjetnamska marknaðin.