Búnaðargrunnurin vil sleppa at mótrokna skuld

Tað kann ikki vera rætt, at nógvur kontantur stuðul verður latin teimum, sum frammanundan ikki halda sínar skyldur til tað almenna, og tað almenna ikki hevur møguleika at mótrokna. Eitt framkomið samfelag kann ikki hava slíkar skipanir. Tað er ábyrgdarleyst.

Tað sigur nevndin í Búnaðargrunninum í brævi til Fiskimálaráðið, nú bøndur skulu fáa pengar úr grunninum at hoyggja fyri. Talan er um góðar 4,1 millión krónur um árið í seks ár. Pengarnir skulu takast úr Búnaðargrunninum.

Mótrokna skuld

Búnaðargrunnurin gjørdi eisini fyrr í ár vart við, at grunnurin í summum førum hevur transport í stuðli. Viðvíkjandi stráfóðurstuðlinum, sum nú skal latast, vil Búnaðargrunnurin sleppa at mótrókna hjá teimum bøndrum, sum hava falna skuld til grunnin.

Búnaðargrunnurin vísir á møguleikan, at stráfóðurstuðulin verður brúktur til at gjalda skuld í bankunum, samstundis sum Búnaðargrunnurin ikki fær sínar pengar frá bóndanum. Fíggjarnevndin hjá løgtinginum fekk eisini brævið frá Búnaðargrunninum.

Og nevndin vil hava landsstýrismannin í landbúnaðarmálum at tryggja, at allur stuðulin fer beinleiðis til tað, hann er ætlaður, til økta føroyska stráfóðurframleiðslu.