Viðareiðistunnilin 25 mió. kr. dýrari

Tunnilin til Viðareiðis kostar 25 milliónir krónur meira enn løgtingið hevur játtað.

Tað kunngjørdi Jørgen Niclasen, landsstýrismaður í fíggjarmálum, í løgtinginum í gjár.

Tá tilboðini komu inn, gjørdist greitt, at tunnilin kostar nógv meira enn 162 milliónir. Nú Landsverk hevur kannað tilboðini, er kostnaðurin 187 milliónir krónur. Landsverk er biðið um at meta, um til ber at fáa tunnilin fyri 162 milliónir, sum løgtingið hevur játtað.

Jørgen Niclasen segði eisini, at arbeiðið at gera ein betri veg til Viðareiðis í staðin fyri tunnil, verður ikki boðið út.